قبل جوازي كنت عارفة إن فيه طقوس لازم تعملها العروسة قبل الفرح، وأهم الطقوس دي كانت العروسة لازم تحُط حِنَّة بلدي وتتزين بزينة مُعينة لزوجها، واللي كانت فرحانة أوي ومتحمسة عشان تقوم بالمهمة دي هي أخت جوزي اللي كانت فرحانة أوي ومستنية فرح أخوها الوحيد اللي فضل في ضهرها بعد مـ,ـوت أمها وأبوها..
رغم إنهم حاولوا يبوظوا الجوازة على مدار سنتين ومكنوش موافقين عليا إلا إن بعد مـ,ـوتهم جوزي جالنا البيت وقال إنه عاوزني ومش هيسبني، وقرر إنه يسيب الوِرث كله تقريبًا في حساب بنكي لأخته ويديها الشقة اللي تحت تعيش فيها وأحنا نعيش في الشقة اللي فوق بما إنه مقتدر وبيشتغل ومش محتاج..
تفاصيل كتير مكنتش مهتمة بيها بقدر ما كنت بحاول أفرح بليلة العُمر اللي بتقرب كل شوية، وفعلًا وقبل الفرح بيوم (هناء) أخت جوزي اللي كاتب عليا جتلي ومعاها كل حاجات الزينة وسابتها عندي عشان تيجي يوم الفرح وتجهزني لأخوها، وبما إنها يتيمة وملهاش حد كنت من جوايا مقررة إنها تكون أختي وأعوضها عن أي فقدان، وجت يوم الفرح الصبح بدري وبدأت تِخلط الحِنَّة بالمية وبمواد كتير وبدأت تجهز العطور والبخور وحاجات هي عارفاها كويس..
فضلت معايا يمكن 4 ساعات لحد ما بدأت أتحنٌى فعلًا بالحِنة، الغريب إن ريحة الحِنَّة كانت غريبة أوي، لدرجة إني طلبت منها تفتح الشباك لأني مكنتش متحملة الريحة، وكمان لما حطتها حسيت إن الحِنة حية أو بتتحرك وبقيت عايز أحك بضوافري مكان الحِنة، ولما قولتلها على شعوري ده قالتلي يمكن عشان معملتش حِنَّة من زمان والجِلد مش متعود عليها..
وفعلًا تمت الأمور بخير، وكان فرح محترم كل الناس كانت خارجة ومبسوطة منه، بس مع دخولي أنا وجوزي لشقتنا وتحديدًا أوضتنا الخاصة بدأنا نشم ريحة مش حلوة خالص، فتحنا الشبابيك وعطرنا الجو وبرضه الريحة كانت سيئة جدًا ولا تُطاق، قررنا إننا نغير الأوضة خالص وندخل أوضة تانية بس الريحة فضلت معانا، ريحة غريبة وسيئة تخليك مش طايق تقعد في المكان، ولما يأسنا قررنا إننا ننام الليلة وبكرة نفتش عن مصدر الريحة دي لأن اليوم كان مُرهق بطريقة كبيرة جدًا..
وأثناء نومي بدأت أحك في رجلي حك غيري طبيعي، وكأني اتصبت بحساسية شديدة أوي، فضلت أحك فيها يمكن طول الليل لحد ما صحيت لقيت رجلي ملتهبة ومتخربشة وشكلها صعب جدًا، وكانت فيه جر,وح ود,م بسيط بينزل من مكان الجروح دي، وفضل الموضوع معايا يوم كامل مع وجود الريحة اللي مش عايزة تروح أبدًا، لحد ما قررت أجيب دكتور البيت لما صحيت ولقيت الألم بقا لا يُطاق..
ولما جه الدكتور كتبلي على مراهم وقالي إنها حساسية شديدة بسبب الحِنَّة تقريبا اللي حطتها على رجلي يوم الفرح، وإننا لازم نتعامل بحذر لأن فيه فطر,يات وممكن يحصل تآكل في الجلد كمان، معرفش ليه حسيت بخوف غير طبيعي ورجليا حالتها كانت بتس,وء ساعة بعد ساعة، لحد ما قررنا في النهاية إننا نربطها بشاش وقطن لأنها التهبت وبقت بتنزل إفرا,زات غريبة، جوزي من كتر اله,م والغ,م خرج وأنا فضلت أبكي وفضلت أدعي ربنا يفك عننا الكرب اللي أحنا فيه ده، لكن الموضوع كان بيسوء ولما صورت رجلي وبعتها للدكتور طلب مني تفضل مربوطة بالشاش والقطن 24 ساعة كاملين..
ووسط تعبي وقلقي ده بدأت أحس إن فيه حاجة معايا في الشقة، حاجة غريبة، إحساس تقيل وجسمي كل شوية يترعش واحس بقشعريرة غريبة بتجري في جسمي كله، وفعلًا بدأت المح خيال داخل لباب الحمام، وشوية وبقت حنفية الحمام تفتح وتقفل، ولما زادت الأمور اتصلت بجوزي وأنا منهارة وخايفة وحكتله كل حاجة، وبقا للأسف عندي شك في أكتر إنسانة حبيتها وكنت عايزة أعوضها عن فقدانها، هل عملت فيا حاجة عشان تأذيني، ولو عملت كدا ليه، هل عشان أبوها وأمها رفضوني زمان، لسة شايفاني أقل منهم..
للأسف كتر التفكير خلاني أنهار تمامًا وزعقت مع جوزي وقولتله على كل شكوكي، كان هيتهور عليا ويضر*بني، وسبحان الله وكأن ربنا أراد إنها تتكشف، العطار اللي اشترت منه الحِنَّة اتصل بجوزي وقاله إنه بيحاول يوصل لأخته من أيام ومش عارف، وقاله يبلغها متخلطش حاجة بالحِنَّة عشان متأذيش حد لأن الجلد بيكون حساس للمواد الكيماوية اللي بتتخلط بيها..
وبقا الشك هيجننا لحد ما عرفنا من مِرسال إن أخته كانت عند دجـ,ـال قبل الفرح، وقتها بس سبت البيت كله ومشيت وأنا
منهارة، كنت هتجنن من جوايا ومش عارفة أيه اللي يخليها تعمل كل ده وليه، جوزي حاول يرجعني مقدرتش، قولتله شرطي الوحيد إن الإنسانة دي تختفي، تروح مكان بعيد عن هنا، مش هقدر أحس بالأمان وهي موجودة معايا وفي نفس البيت..
وفعلًا بعد أسبوع كانت أجرت شقة بعيد وجوزي تكفل بيها رغم إنه مكنش طايقها وقرر إنه يرجعني عشان نعيش مع بعض، حمدت ربنا إني أخيرًا اتخلصت منها ويادوب بدأت أحس بالأمان من جوايا، وعرفت إن جوزي طلب ميراثه كله لأنه كان مضحي لواحدة متستاهلش، وحسيت يمكن ده نوع من أنواع العدل لأنها فعلًا متستاهلش، بس واضح إن التمثلية مكملتش للنهاية بسبب الجشع وبسبب إن الخبر انتشر إن جوزي خد مبلغ كبير من أخته بعد ما كان سايبه ليها..
أنا اللي دبرت كل ده، بكرهها من زمان من أيام ما أمها وأبوها رفضوني، كنت بتمنى يمـ,ـوتوا في كل لحظة وسبحان الله اتحققت أمنيتي وم*اتوا، وفضلت وراه لحد ما خطبني واتجوزني، كنت كل ما بشوفها بفتكر أبوها وأمها اللي كانوا شايفين حقيقتي ورافضيني، وكنت مقهورة إن كل فلوس الوِرث تروحلها وعايزة أرجع فلوسي وفلوس جوزي، عشان كدا عملت الخطة بالكامل، ماسك للقدم عامل زي الشراب يبان كأنه حقيقي وتظهر فيه الالتهابات، ازازة بتطلع ريحة وحشة كنت برشها عليا كل شوية وسط أزايز البرفان، وتمثلية إني بشوف حاجات في الشقة، والدكتور والعطار ناس أعرفهم وقالوا اللي قولته بالظبط، وكملت صاحبتي الموضوع لما قالت إنها شافت أخت جوزي عند الدجال..
